ଶ୍ରୀମହାଗଣପତି-ପଞ୍ଚକମ୍

[ ଏହି ଧ୍ୟାନ ମନ୍ତ୍ରକୁ ପ୍ରତିଦିନ ତ୍ରିସନ୍ଧ୍ୟାରେ 11- 11 ଥର ପାଠ କଲେ ଶ୍ରିଗଣେଶ ଙ୍କ କୃପା ମିଳିଥାଏ। ସ୍ଥିର ଲକ୍ଷ୍ମୀ ଓ ଯଶ ର ପ୍ରାପ୍ତି ହୋଇଥାଏ। ସମୟ ଅବଧି-45 ଦିନ। ପଞ୍ଚ/ଷୋଡଶ ଉପଚାର ପୂଜା॰]

 

ପ୍ରାତଃ ସ୍ମରାମି ଗଣନାଥମୁଖାରବିନ୍ଦଂ

     ନେତ୍ରତ୍ରୟଂ ମଦସୁଗନ୍ଧିତଗଣ୍ଡୟୁଗ୍ମମ୍ ।

ଶୁଣ୍ଡଞ୍ଚ ରତ୍ନଘଟମଣ୍ଡିତମେକଦନ୍ତଂ

     ଧ୍ୟାନେନ ଚିନ୍ତିତଫଲଂ ବିତରନ୍ନମୀକ୍ଷ୍ଣମ୍  ॥ ୧॥

 

ପ୍ରାତଃ ସ୍ମରାମି ଗଣନାଥଭୁଜାନଶେଷା-

     ନବ୍ଜାଦିଭିର୍ବିଲସିତାନ୍ ଲସିତାଙ୍ଗଦୈଶ୍ଚ ।

ଉଦ୍ଦଣ୍ଡବିଘ୍ନପରିଖଣ୍ଡନଚଣ୍ଡଦଣ୍ଡାନ୍

     ବାଞ୍ଛାଧିକଂ ପ୍ରତିଦିନଂ ବରଦାନଦକ୍ଷାନ୍  ॥ ୨॥

 

ପ୍ରାତଃ ସ୍ମରାମି ଗଣନାଥବିଶାଲଦେହଂ

     ସିନ୍ଦୂରପୁଞ୍ଜପରିରଞ୍ଜିତକାନ୍ତିକାନ୍ତମ୍ ।

ମୁକ୍ତାଫଲୈର୍ମଣିଗଣୈର୍ଲସିତଂ ସମନ୍ତାତ୍

     ଶ୍ଲିଷ୍ଟଂ ମୁଦା ଦୟିତୟା କିଲ ସିଦ୍ଧଲକ୍ଷ୍ମ୍ୟା ॥ ୩॥

 

ପ୍ରାତଃ ସ୍ତୁବେ ଗଣପତିଂ ଗଣରାଜରାଜଂ

     ମୋଦପ୍ରମୋଦସୁମୁଖାଦିଗଣୈଶ୍ଚ ଜୁଷ୍ଟମ୍ ।

ଶକ୍ତ୍ୟଷ୍ଟଭିର୍ୱିଲସିତଂ ନତଲୋକପାଲଂ

     ଭକ୍ତାର୍ତିଭଞ୍ଜନପରଂ ବରଦଂ ବରେଣ୍ୟମ୍  ॥ ୪॥

 

ପ୍ରାତଃ ସ୍ମରାମି ଗଣନାୟକନାମରୂପଂ

     ଲମ୍ବୋଦରଂ ପରମସୁନ୍ଦରମେକଦନ୍ତମ୍ ।

ସିଦ୍ଧିପ୍ରଦଂ ଗଜମୁଖଂ ସୁମୁଖଂ ଶରଣ୍ୟଂ

     ଶ୍ରେୟସ୍କରଂ ଭୁବନମଙ୍ଗଲମାଦିଦେବମ୍  ॥ ୫॥

 

ଯଃ ଶ୍ଲୋକପଞ୍ଚକମିଦଂ ପଠତି ପ୍ରଭାତେ

     ଭକ୍ତ୍ୟା ଗୃହୀତଚରଣୋ ଗଣନାୟକସ୍ୟ ।

ତସ୍ମୈ ଦଦାତି ମୁଦିତୋ ବରଦାନଦକ୍ଷଃ

     ଚିନ୍ତାମଣିର୍ନିଖିଲଚିନ୍ତିତମର୍ଥକାମମ୍  ॥ ୬॥

 

ଇତି ଶ୍ରୀଦତ୍ତାତ୍ରେୟାନନ୍ଦନାଥବିରଚିତଂ ଶ୍ରୀମହାଗଣପତିପଞ୍ଚକଂ ସମ୍ପୂର୍ଣମ୍ ॥