ଶ୍ରୀଲଲିତା ପ୍ରାତଃ-ସ୍ତୋତ୍ର-ପଞ୍ଚକମ୍

ପ୍ରାତଃ ସ୍ମରାମି ଲଲିତାବଦନାରବିନ୍ଦଂ ବିମ୍ବାଧରଂ ପୃଥୁଲମୌକ୍ତିକଶୋଭିନାସମ୍  ।

ଆକର୍ଣଦୀର୍ଘନୟନଂ ମଣିକୁଣ୍ଡଲାଢ୍ୟଂ ମନ୍ଦସ୍ମିତଂ ମୃଗମଦୋଜ୍ଜ୍ୱଲଭାଲଦେଶମ୍  ॥ ୧॥

ପ୍ରାତର୍ଭଜାମି ଲଲିତାଭୁଜକଲ୍ପବଲ୍ଲୀଂ ରତ୍ନାଙ୍ଗୁଳୀୟଲସଦଙ୍ଗୁଲିପଲ୍ଲବାଢ୍ୟାମ୍  ।

ମାଣିକ୍ୟହେମବଲୟାଙ୍ଗଦଶୋଭମାନାଂ ପୁଣ୍ଡ୍ରେକ୍ଷୁଚାପକୁସୁମେଷୁସୃଣୀଃଦଧାନାମ୍  ॥ ୨॥

ପ୍ରାତର୍ନମାମି ଲଲିତାଚରଣାରବିନ୍ଦଂ ଭକ୍ତେଷ୍ଟଦାନନିରତଂ ଭବସିନ୍ଧୁପୋତମ୍  ।

ପଦ୍ମାସନାଦିସୁରନାୟକପୂଜନୀୟଂ ପଦ୍ମାଙ୍କୁଶଧ୍ୱଜସୁଦର୍ଶନଲାଞ୍ଛନାଢ୍ୟମ୍  ॥ ୩॥

ପ୍ରାତଃ ସ୍ତୁବେ ପରଶିବାଂ ଲଲିତାଂ ଭବାନୀଂ ତ୍ରୟ୍ୟନ୍ତବେଦ୍ୟବିଭବାଂ କରୁଣାନବଦ୍ୟାମ୍  ।

ବିଶ୍ୱସ୍ୟ ସୃଷ୍ଟିବିଲୟସ୍ଥିତିହେତୁଭୂତାଂ ବିଶ୍ୱେଶ୍ୱରୀଂ ନିଗମବାଙ୍-ମନସାତିଦୂରାମ୍  ॥ ୪॥

ପ୍ରାତର୍ୱଦାମି ଲଲିତେ ତବ ପୁଣ୍ୟନାମ କାମେଶ୍ୱରୀତି କମଲେତି ମହେଶ୍ୱରୀତି  ।

ଶ୍ରୀଶାମ୍ଭବୀତି ଜଗତାଂ ଜନନୀ ପରେତି ବାଗ୍ଦେବତେତି ବଚସା ତ୍ରିପୁରେଶ୍ୱରୀତି  ॥ ୫॥

ଯଃ ଶ୍ଲୋକପଞ୍ଚକମିଦଂ ଲଲିତାମ୍ବିକାୟାଃ ସୌଭାଗ୍ୟଦଂ ସୁଲଲିତଂ ପଠତି ପ୍ରଭାତେ  ।

ତସ୍ମୈ ଦଦାତି ଲଲିତା ଝଟିତି ପ୍ରସନ୍ନା ବିଦ୍ୟାଂ ଶ୍ରିୟଂ ବିମଲସୌଖ୍ୟମନନ୍ତକୀର୍ତିମ୍  ॥ ୬॥

॥  ଇତି ଶ୍ରୀମଚ୍ଛଙ୍କରଭଗବତଃ କୃତୌ ଲଲିତା ପଞ୍ଚକମ୍ ସମ୍ପୂର୍ଣମ୍ ॥