ଶ୍ରୀ ବିଦ୍ୟା—[38]-01-07-2021

ଶ୍ରୀବାଲା-ପଞ୍ଚ-ଚାମର-ସ୍ତବଃ

ଗିରୀନ୍ଦ୍ରରାଜବାଲିକାଂ ଦିନେଶତୁଲ୍ୟରୂପିକାମ୍ ।

ପ୍ରବାଲଜାପ୍ୟମାଲିକାଂ ଭଜାମି ଦୈତ୍ୟମର୍ଦିକାମ୍ ॥ ୧॥

ନିଶେଶମୌଲିଧାରିକାଂ ନୃମୁଣ୍ଡପଙ୍କ୍ତିଶୋଭିକାମ୍ ।

ନବୀନୟୌବନାଖ୍ୟକାଂ ସ୍ମରାମି ପାପନାଶିକାମ୍ ॥ ୨॥

ଭବାର୍ଣବାତ୍ତୁ ତାରିକାଂ ଭବେନ ସାର୍ଧଖେଲିକାମ୍ ।

କୁତର୍କକର୍ମଭଞ୍ଜିକାଂ ନମାମି ପ୍ରୌଢରୂପିକାମ୍ ॥ ୩॥

ସ୍ୱରୂପରୂପକାଲିକାଂ ସ୍ୱୟଂ ସ୍ୱୟମ୍ଭୁସ୍ୱାତ୍ମିକାମ୍ ।

ଖଗେଶରାଜଦଣ୍ଡିକାଂ ଅଈକରାଂ ସୁବୀଜକାମ୍ ॥ ୪॥

ଶ୍ମଶାନଭୂମିଶାୟିକାଂ ବିଶାଲଭୀତିବାରିଣୀମ୍ ।

ତୁଷାରତୁଲ୍ୟବାଚିକାଂ ସନିମ୍ନତୁଙ୍ଗନାଭିକାମ୍ ॥ ୫॥

ସୁପଟ୍ଟବସ୍ତ୍ରସାଜିକାଂ ସୁକିଙ୍କିଣୀବିରାଜିତାମ୍ ।

ସୁବୁଦ୍ଧିବୁଦ୍ଧିଦାୟିକାଂ ସୁରା ସଦା ସୁପୀୟକାମ୍ ॥ ୬॥

ସକ୍ଲୀଂ ସସୌଃ ସସର୍ଗକାଂ ସନାତନେଶ ଚାମ୍ବିକାମ୍ ।

ସସୃଷ୍ଟିପାଲନାଶିକାଂ ପ୍ରଣୌମି ଦୀର୍ଘକେଶକାମ୍ ॥ ୭॥

ସହସ୍ରମାର୍ଗପାଲିକା ପରାପରାତ୍ମଭବ୍ୟକା ।

ସୁଚାରୁଚାରୁବକ୍ତ୍ରକା ଶିବଂ ଦଦାତୁ ଭଦ୍ରିକା ॥ ୮॥

ଇତ୍ୟେତତ୍ପରମଂ ଗୁହ୍ୟଂ ପଞ୍ଚଚାମରସଂଜ୍ଞକମ୍ ।

ବାଲାଗ୍ରେ ଯଃ ପଠତି ଚ ତସ୍ୟ ସିଦ୍ଧିର୍ଭବେଦ୍ଧ୍ରୁବମ୍ ॥ ୯॥

ଯଂ ଯଂ ଚିନ୍ତୟତେ କାମଂ ତଂ ତଂ ପ୍ରାପ୍ନୋତି ସାଧକଃ ।

ସିଦ୍ଧିଃ କରତଲେ ତସ୍ୟ ମୃତେ ମୋକ୍ଷମବାପ୍ନୁୟାତ୍ ॥ ୧୦॥

ଇତି ଚନ୍ଦ୍ରଦ୍ୱୀପାବତାରେ ଶ୍ରୀବାଲାପଞ୍ଚଚାମରସ୍ତବଃ ସମ୍ପୂର୍ଣଃ ।

କୈଲାଶ ନାଥ ଅଗ୍ରୱାଲ,

ଶ୍ରୀ ବିଦ୍ୟା ଉପାସକ

Continue….