ଶ୍ରୀ ବିଦ୍ୟା—[39]-03-07-2021

ଶ୍ରୀବାଲା-ପଟଲମ୍

କୈଲାସଶିଖରାସୀନଂ ଭଗବନ୍ତମୁମାପତିମ୍ ।

ଚନ୍ଦ୍ରାର୍ଧମୁକୁଟଂ ଦେବଂ ସୋମସୂର୍ୟାଗ୍ନିଲୋଚନମ୍ ॥ ୧॥

ଗଜଚର୍ମପରୀଧାନଂ ବିରୂପାକ୍ଷଂ ସୁରାର୍ଚିତମ୍ ।

ଗଣଗନ୍ଧର୍ୱୟକ୍ଷେନ୍ଦ୍ରଦେବାସୁରନମସ୍କୃତମ୍ ॥ ୨॥

ବିହସନ୍ତଂ ଜପନ୍ତଂ ଚ ପଠନ୍ତଂ ଚ ମୁହୁର୍ମୁହୁଃ ।

ଉତ୍ଥାୟ ପ୍ରଣତା ଭୂତ୍ୱା ଚେଦଂ ପୃଚ୍ଛତି ଭୈରବୀ ॥ ୩॥

ଶ୍ରୀଭୈରବୀ -

ଭଗବନ୍ କରୁଣାମ୍ବୋଧେ ସର୍ୱାଗମବିଶାରଦ ।

ତ୍ୱତ୍ପ୍ରସାଦାନ୍ମୟା ସର୍ୱାଃ ଶ୍ରୁତା ବିଦ୍ୟାଃ ସୁରେଶ୍ୱର ॥ ୪॥

ଇଦାନୀଂ ଶ୍ରୋତୁମିଚ୍ଛାମି ବାଲାଂ ତ୍ରିପୁରସୁନ୍ଦରୀମ୍ ।

ଦୟାସ୍ତି ଯଦି ମେ ଦେବ ବଦ ବିଦ୍ୟାଂ ମହେଶ୍ୱର ॥ ୫॥

ଶ୍ରୀଭୈରବଃ -

ଶୃଣୁ ଦେବି ! ପ୍ରବକ୍ଷ୍ୟାମି ପଞ୍ଚାଙ୍ଗଂ ସାଧକେଷ୍ଟଦମ୍ ।

ପଟଲଂ ପଦ୍ଧତିଂ ବର୍ମ ତଥା ନାମ୍ନାଂ ସହସ୍ରକମ୍ ॥ ୬॥

ସ୍ତବରାଜଂ ମହାଦେବି ଶୃଣୁଷ୍ୱୈକାଗ୍ରମାନସା ।

ଶ୍ରୀବାଲା ପରମେଶାନୀ ଭୁକ୍ତିମୁକ୍ତିପ୍ରଦାୟିନୀ ॥ ୭॥

ରାଜ୍ୟଂ ଦେୟଂ ଶିରୋ ଦେୟଂ ଗୃହଂ ଲକ୍ଷ୍ମୀୟୁତଂ ତଥା

ସର୍ୱଂ ଦେୟଂ ମହାଦେବି ନ ଦେୟମିଦମୁତ୍ତମମ୍ ॥ ୮॥

ଅସ୍ୟା ବିଦ୍ୟାୟାଃ ସଦୃଶୀ ବିଦ୍ୟା ନାନ୍ୟା କଲୌ ଯୁଗେ ।

ଶ୍ରୀବାଲାତ୍ରିପୁରାବିଦ୍ୟା ଶୀଘ୍ରଂ ସିଦ୍ଧିପ୍ରଦା ସ୍ମୃତା ॥ ୯॥

ଦେୟା ଶିଷ୍ୟାୟ ଶାନ୍ତାୟ ଗୁରୁଭକ୍ତିରତାୟ ଚ ।

ନାଭକ୍ତାୟ ପ୍ରଦାତବ୍ୟା ବିଦ୍ୟେୟଂ ପରମେଶ୍ୱରି ॥ ୧୦॥

ମନ୍ତ୍ରୋଦ୍ଧାରଂ ତଥା ଯନ୍ତ୍ରଂ ପ୍ରସ୍ତାରଂ ଧ୍ୟାନମେବ ଚ ।

ପ୍ରୟୋଗାନ୍ ସଂପ୍ରବକ୍ଷ୍ୟାମି ଦେବଦେବ୍ୟା ମହେଶ୍ୱରି ॥ ୧୧॥

ପ୍ରଥମଂ ଶୃଣୁ ଦେବେଶି ମନ୍ତ୍ରୋଦ୍ଧାରଂ ଫଲପ୍ରଦମ୍ ।

ଗୋପନୀୟଂ ପ୍ରୟତ୍ନେନ ଯେନ ସିଦ୍ଧିଃ ପ୍ରଜାୟତେ ॥ ୧୨॥

ବାଗ୍ଭବଂ କାମରାଜଶ୍ଚ ଶକ୍ତିମଧ୍ୟେଽଭିଧଂ ନ୍ୟସେତ୍ ।

ନମୋଽନ୍ତେ ଦେବି ବାଲାୟା ମନ୍ତ୍ରୋଽୟଂ ଚାଷ୍ଟବର୍ଣକଃ ॥ ୧୩॥

ନାପି ବିଘ୍ନୋ ନ ବା ଶୌଚୋ ନ ବାରନିୟମସ୍ତଥା ।

ସ୍ୱୟଂ ସିଦ୍ଧୋ ମହାଦେବି ମନ୍ତ୍ରରାଜଃ କଲୌ ଯୁଗେ ॥ ୧୪॥

ଦକ୍ଷିଣାମୂର୍ତିପଙ୍କ୍ତ୍ୟୌ ଚ ମୁନିଶ୍ଛନ୍ଦଃ କ୍ରମାତ୍ ସ୍ମୃତମ୍ ।

ଦେବତା ତ୍ରିପୁରା ବାଲା ଆଦ୍ୟନ୍ତେ ବୀଜଶକ୍ତିକେ ॥ ୧୫॥

କ୍ଲୀଂ କୀଲକଂ ସମାଦିଷ୍ଟଂ ଧର୍ମକାମାର୍ଥମୁକ୍ତୟେ ।

ଶିରସି ବଦନେ ଦେବି ହୃଦୟେ ଗୁହ୍ୟଦେଶକେ ॥ ୧୬॥

ପାଦୟୋର୍ନାଭିକମଲେ ସର୍ୱାଙ୍ଗେ ଚ ତଥା ନ୍ୟସେତ୍ ।

ଋଷ୍ୟାଦିକଂ ମହାଦେବି କୁର୍ୟାନ୍ନ୍ୟାସବିକଲ୍ପନାମ୍ ॥ ୧୭॥

କରନ୍ୟାସଂ ଷଡଙ୍ଗଂ ଚ ବୀଜୈଃ କୁର୍ୟାନ୍ମହେଶ୍ୱରି ।

ଅସ୍ୟା ଧ୍ୟାନଂ ପ୍ରବକ୍ଷ୍ୟାମି ସାଧକାନାଂ ହିତପ୍ରଦମ୍ ॥ ୧୮॥

ରକ୍ତାମ୍ବରାଂ ଚନ୍ଦ୍ରକଲାବତଂସାଂ ସମୁଦ୍ୟଦାଦିତ୍ୟନିଭାଂ ତ୍ରିନେତ୍ରାମ୍ ।

ବିଦ୍ୟାକ୍ଷମାଲାଽଭୟଦାନହସ୍ତାଂ ଧ୍ୟାୟାମି ବାଲାମରୁଣାମ୍ବୁଜସ୍ଥାମ୍ ॥ ୧୯॥

ଇତି ଧ୍ୟାତ୍ୱା ମହାଦେବୀଂ ଜପେନ୍ମତ୍ରଂ ସୁସିଦ୍ଧଦମ୍ ।

ଲକ୍ଷତ୍ରୟଂ ପୁରଶ୍ଚର୍ୟାବିଧୌ ସାଧକସତ୍ତମଃ ॥ ୨୦॥

ଅଥ ବକ୍ଷ୍ୟାମି ଦେବେଶି ଯନ୍ତ୍ରୋଦ୍ଧାରଂ ସୁଦୁର୍ଲଭମ୍ ।

ସାଧକସ୍ୟ ମହାଦେବ୍ୟା ଭୁକ୍ତିମୁକ୍ତିଫଲପ୍ରଦମ୍ ॥ ୨୧॥

ବିନ୍ଦୁତ୍ରିକୋଣବସୁ(ରସ)କୋଣକନାଗପତ୍ରବୃତ୍ତତ୍ରୟାଞ୍ଚିତମହୀସଦନତ୍ରୟଂ ଚ

ବାଲାଦିଚକ୍ରମିଦମାର୍ତିହରଂ ଗିରୀଶେ ବ୍ରହ୍ମେନ୍ଦ୍ରବିଷ୍ଣୁନମିତଂ ଗଦିତଂ ମୟା ତେ ॥

ଏବଂ ବିଲିଖିତେ ଯନ୍ତ୍ରେ ପୀଠଶକ୍ତୀଃ ପ୍ରପୂଜୟେତ୍ ।

ଇଚ୍ଛାଜ୍ଞାନକ୍ରିୟାଶ୍ଚୈବ କାମିନୀ କାମଦାୟିନୀ ॥ ୨୩॥

ରତୀ ରତିପ୍ରିୟାନନ୍ଦା ମନୋନ୍ମନ୍ୟପି ଚାନ୍ତିମା ।

ପୀଠଶକ୍ତୀରିମା ଇଷ୍ଟ୍ୱା ପୀଠଂ ତନ୍ମନୁନା ଦିଶେତ୍ ॥ ୨୪॥

ବ୍ୟୋମପର୍ୱତତାର୍ତୀୟଂ ସଦାଶିବମହାପଦମ୍ ।

ପୀଠପଦ୍ମାସନାୟାନ୍ତେ ନମୋଽନ୍ତଃ ପୀଠମନ୍ତ୍ରକଃ ॥ ୨୫॥

ଷୋଡଶାର୍ଣସ୍ତତୋ ମୂର୍ତୌ କ୍ଲୃପ୍ତାୟାଂ ମୂଲମନ୍ତ୍ରତଃ ।

ଆବାହ୍ୟ ପୂଜୟେଦ୍ଦେବୀମୁପଚାରୈଃ ପୃଥଗ୍ୱିଧୈଃ ॥ ୨୬॥

ଦେବୀମିଷ୍ଟ୍ୱା ମଧ୍ୟଯୋନୌ ତ୍ରିକୋଣେ ମତିପୂର୍ୱକମ୍ ।

ବାମକୋଣେ ରତିଂ ଦକ୍ଷେ ପ୍ରୀତିମଗ୍ରେ ମନୋଭବାମ୍ ॥ ୨୭॥

ଯୋନ୍ୟାଂ ତୁ ବହ୍ନିକୋଣାଦାବଙ୍ଗାନି ପରିପୂଜୟେତ୍ ।

ମଧ୍ୟଯୋନ୍ୟାଂ ବହିଃ ପୂର୍ୱଦିକ୍ଷୁ ଚାଗ୍ରେ ସ୍ମରାନପି ॥ ୨୮॥

ବାଣଦେବୀସ୍ତଦ୍ୱଦେବ ଶକ୍ତୀରଷ୍ଟାସୁ ଯୋନିଷୁ ।

ସୁଭଗାଖ୍ୟା ଭଗା ପଶ୍ଚାତ୍ତୃତୀୟା ଭଗସର୍ପିଣୀ ॥ ୨୯॥

ଭଗମାଲା ତଥାନଙ୍ଗାଦ୍ୟାନଙ୍ଗକୁସୁମା ପରା ।

ଅନଙ୍ଗମେଖଲାନଙ୍ଗମଦନେତ୍ୟଷ୍ଟଶକ୍ତୟଃ ॥ ୩୦॥

ପଦ୍ମକେସରଗା ବ୍ରାହ୍ମୀମୁଖାଃ ପତ୍ରେଷୁ ଭୈରବାଃ ।

ଦଲାଗ୍ରେଽପ୍ୟଷ୍ଟ ପୀଠାନି କାମରୂପାଖ୍ୟମାଦିମମ୍ ॥ ୩୧॥

ମଲୟଂ କୌଲଗିର୍ୟାଖ୍ୟଂ ଚୌହାରାଖ୍ୟଂ କୁଲାନ୍ତକମ୍ ।

ଜାଲନ୍ଧରଂ ତଥୌଡ୍ୟାଣଂ ଦେବକୂଟମଥାଷ୍ଟମମ୍ ॥ ୩୨॥

ଭୂଗୃହେ ଚ ଧରାଦିକ୍ଷୁ ହେରୁକଂ ତ୍ରିପୁରାନ୍ତକମ୍ ।

ବେତାଲମଗ୍ନିଜିହ୍ୱଂ ଚ କାଲାନ୍ତକକପାଲିନୌ ॥ ୩୩॥

ଏକପାଦଂ ଭୀମରୂପଂ ମଲୟଂ ହାଟକେଶ୍ୱରମ୍ ।

ଶକ୍ରାଦ୍ୟାନାୟୁଧୈଃ ସର୍ୱୈଃ ସ୍ୱସ୍ୱଦିକ୍ଷୁ ସମର୍ଚୟେତ୍ ॥ ୩୪॥

ତଦ୍ବହିର୍ଦିକ୍ଷୁ ବଟୁକଂ ଯୋଗିନୀଃ କ୍ଷେତ୍ରପାଲକମ୍ ।

ଗଣେଶଂ ବିଦିଶାସୁ ବୈ ବସୂନ୍ ସୂର୍ୟଂ ଶିବଂ ତଥା ॥ ୩୫॥

(ସର୍ୱଭୂତାନ୍ ସମଭ୍ୟର୍ଚ୍ୟ ପୂଜୟେଦାୟୁଧାଂସ୍ତଥା) ।

ବାଲାଂ ମଧ୍ୟେ ବିଭାବ୍ୟାଦୌ କାମେଶ୍ୱରାଙ୍କମଧ୍ୟଗାମ୍ ॥ ୩୬॥

ମକାରୈଃ ପଞ୍ଚଭିଃ କୌଲଃ କୌଲାଚାରପରାୟଣଃ ।

ସମ୍ପୂଜୟେନ୍ମହାଦେବି ସାଧକୋ ମନ୍ତ୍ରସାଧକଃ ॥ ୩୭॥

ବିନ୍ଦୌ ଗନ୍ଧାକ୍ଷତୈଃ ପୁଷ୍ପୈର୍ଧୂପଦୀପାଦିତର୍ପଣୈଃ ।

ଲୟାଙ୍ଗମିଦମାଖ୍ୟାତଂ ପ୍ରୟୋଗାନ୍ ଶୃଣୁ ପାର୍ୱତି ॥ ୩୮॥

ଯାନ୍ ବିଧାୟ ମନୁଃ ଶୀଘ୍ରଂ ସିଦ୍ଧିଭାଗ୍ଭବତି ଧ୍ରୁବମ୍ ।

ସ୍ତମ୍ଭନଂ ମୋହନଂ ଚୈବ ମାରଣାକର୍ଷଣେ ତଥା ॥ ୩୯॥

ବଶୀକାରଂ ତଥୋଚ୍ଚାଟଂ ଶାନ୍ତିକଂ ପୌଷ୍ଟିକଂ ତଥା ।

ଏତତ୍ସାଧନମାଚକ୍ଷେ ସାରଭୂତଂ ମନୋଃ ପ୍ରିୟେ ॥ ୪୦॥

ଅଦେୟଂ ଦେବ୍ୟଭକ୍ତାୟ ଗୋପ୍ୟଂ ଗୁହ୍ୟତମଃ ପଶୋଃ ।

 ୧. ପ୍ରତିପଦ୍ଦିବସେ ଦେବି ! ସ୍ନାତ୍ୱା କୃତ୍ୱାହ୍ନିକୀଂ କ୍ରିୟାମ୍ ॥ ୪୧॥

ମଧ୍ୟାହ୍ନେ ନିର୍ଜନଂ ଗତ୍ୱା ଯଥାବଦୟୁତାବଧି ।

ହୋମୋ ଦଶାଂଶତଃ କାର୍ୟୋ ଘୃତପାୟସବର୍ହକୈଃ ॥ ୪୨॥

ସନ୍ତର୍ପ୍ୟ ଦେବତାଃ ସଦ୍ୟଃ ସ୍ତମ୍ଭନଂ ଜାୟତେ ଧ୍ରୁବମ୍ ।

ରାଜସୂର୍ୟେନ୍ଦୁବାତାନାଂ ଦସ୍ୟୁବାଦିମୁଖେଷୁ ଚ ॥ ୪୩॥

 ୨. ଦର୍ଶେ ସାୟଂ ଶ୍ମଶାନେ ତୁ ଜପେଦୁଲୂକବିଷ୍ଟରଃ ।

ଅୟୁତଂ ତଦ୍ଦଶାଂଶେନ ହୋମଂ ସର୍ପିସ୍ସୁରାନ୍ୱିତୈଃ ॥ ୪୪॥

ଭୂତାଖ୍ୟେ ବାସରେ ଦେବି ଗତ୍ୱା ପ୍ରେତାଲୟଂ ନିଶି ॥ ୪୫॥

ଚିତାଗ୍ରେ ସଞ୍ଜପେଦ୍ୱିଦ୍ୟାଂ ବୀରେନ୍ଦ୍ରଃ ଷୋଡଶାକ୍ଷରୀମ୍ ।

ଅୟୁତଂ ଚ ହୁନେନ୍ମନ୍ତ୍ରୀ ଚିତାଗ୍ନୌ ଘୃତଗୁଗ୍ଗୁଲମ୍ ॥ ୪୬॥

ଚଣ୍ଡାଲକେଶସହିତଂ ମ୍ରିୟତେ ରିପୁରୁତ୍କଟଃ ।

 ୪. ଅଷ୍ଟାମ୍ୟାଂ ଶୁକ୍ଲପକ୍ଷେ ତୁ ଜପେଦ୍ରହସି ସାଧକଃ ॥ ୪୭॥

ଅୟୁତଂ ମୂଲବିଦ୍ୟାୟା ଧ୍ୟାତ୍ୱା କାନ୍ତାଂ ମନୋଗତାମ୍ ।

ହୋମୋ ଦଶାଂଶତଃ ସର୍ପିର୍ଲାକ୍ଷାପୁଷ୍ପବତୀରଜଃ ॥ ୪୮॥

କରୀରପୂଲଗୋଧୂମୈଃ ସ୍ତ୍ରୀଣାମାକର୍ଷଣଂ ଭବେତ୍ ।

 ୫. ନବମ୍ୟାଂ ସାଧକଃ ସ୍ନାତ୍ୱା କୃତ୍ୱା କର୍ମାହ୍ନିକଂ ପ୍ରିୟେ ॥ ୪୯॥

ଅୟୁତଂ ଘୃତମତ୍ସ୍ୟାଣ୍ଡପଦ୍ମମୁକ୍ତୈଣରୋମଭିଃ ।

ହୋମୋ ବିଧେୟୋ ବରୀଶୈର୍ୱାସବୋ ଦାସତାଂ ବ୍ରଜେତ୍ ॥ ୫୦॥

 ୬. ଚତୁର୍ଥ୍ୟାଂ କୃଷ୍ଣପକ୍ଷେ ତୁ ଜପେଚ୍ଚନ୍ଦ୍ରୋଦୟେ ଶିବେ ।

ନଦୀତୀରେ ମନୁଂ ବୀରୋଽୟୁତଂ ଶୀର୍ଷାସନସ୍ଥିତଃ ॥ ୫୧॥

ଦଶାଂଶେନ ହୁନେତ୍ତତ୍ର ଘୃତନୀଲୋତ୍ପଲତ୍ୱଚଃ ।

ଲବଙ୍ଗମରିଚାମ୍ଲାଦୀନ୍ ରିପୋରୁଚ୍ଚାଟନଂ ଭବେତ୍ ॥ ୫୨॥

 ୭. ପଞ୍ଚମ୍ୟାଂ ନିଶି ଦେବେଶି ଜପେଦୟୁତସଙ୍ଖ୍ୟଯା ।

ହୁନେଦ୍ଦଶାଂଶତଃ ସର୍ପିର୍ମତ୍ସ୍ୟମତ୍ସ୍ୟାଣ୍ଡଖର୍ପରାନ୍ ॥ ୫୩॥

ମହାମୟମହାଭୀତି-ମହୋପଦ୍ରବଶାନ୍ତୟେ ।

 ୮. ମହାଷ୍ଟମ୍ୟାଂ ନରଃ ସ୍ନାତ୍ୱା ପୀଠେ ଶ୍ରେଷ୍ଠେ ଦଶାଧିକାମ୍ ॥ ୫୪॥

ବୀରୋ ଦଶାଙ୍କସାହସ୍ରୀଂ ହୁନେତ୍ତତ୍ର ଦଶାଂଶତଃ ।

ଘୃତଖର୍ଜୂରମୃଦ୍ୱୀକା -ନାଘବଲ୍ଲୀଦଲସ୍ରଜଃ ॥ ୫୫॥

ଛାଗମାଂସଂ ସରକ୍ତଂ ଚ ମହାପୁଷ୍ଟିଃ ପ୍ରଜାୟତେ ।

ଇଦଂ ରହସ୍ୟମାଖ୍ୟାତଂ ସର୍ୱତତ୍ତ୍ୱନିରୂପଣମ୍ ॥ ୫୬॥

ସର୍ୱସ୍ୱଂ ମମ ଦେବେଶି ରହସ୍ୟଂ ଗୋପୟେତ୍କଲୌ ।

ସୂର୍ୟାଦିବାରେଷୁ ଜପୈର୍ଦଶସାହସ୍ରସଙ୍ଖ୍ୟକୈଃ ॥ ୫୭॥

ସର୍ୱସିଦ୍ଧିମବାପ୍ନୋତି ନାତ୍ର କାର୍ୟା ବିଚାରଣା ।

ଇତ୍ୟେଷ ପଟଲୋ ଦିବ୍ୟଃ ସ୍ନେହାତ୍ ତବ ପ୍ରକାଶିତଃ ।

ଗୋପ୍ୟାଦ୍ଗୋପ୍ୟୋ ଗୋପ୍ୟତରୋ ଗୋପନୀୟଃ ସ୍ୱୟୋନିବତ୍ ॥ ୫୮॥

ଇତି ଶ୍ରୀମଦ୍ରୁଦ୍ରୟାମଲାନ୍ତର୍ଗତଂ ଶ୍ରୀବାଲାପଟଲଂ ସମ୍ପୂର୍ଣମ୍ ।

କୈଲାଶ ନାଥ ଅଗ୍ରୱାଲ,

ଶ୍ରୀ ବିଦ୍ୟା ଉପାସକ

Continue….