ଶ୍ରୀ ବିଦ୍ୟା—[40]-05-07-2021

ଶ୍ରୀବାଲା-ମନ୍ତ୍ର-ସିଦ୍ଧି-ସ୍ତବଃ

 

ବ୍ରାହ୍ମୀରୂପଧରେ ଦେବି ବ୍ରହ୍ମାତ୍ମା ବ୍ରହ୍ମପାଲିକା ।

ବିଦ୍ୟାମନ୍ତ୍ରାଦିକଂ ସର୍ୱଂ ସିଦ୍ଧିଂ ଦେହି ପରେଶ୍ୱରି ॥ ୧॥

ମହେଶ୍ୱରୀ ମହାମାୟା ମାନନ୍ଦା ମୋହହାରିଣୀ ।

ମନ୍ତ୍ରସିଦ୍ଧିଫଲଂ ଦେହି ମହାମନ୍ତ୍ରାର୍ଣବେଶ୍ୱରି ॥ ୨॥

ଗୁହ୍ୟେଶ୍ୱରୀ ଗୁଣାତୀତା ଗୁହ୍ୟତତ୍ତ୍ୱାର୍ଥଦାୟିନୀ ।

ଗୁଣତ୍ରୟାତ୍ମିକା ଦେବୀ ମନ୍ତ୍ରସିଦ୍ଧିଂ ଦଦସ୍ୱ ମାମ୍ ॥ ୩॥

ନାରାୟଣୀ ଚ ନାକେଶୀ ନୃମୁଣ୍ଡମାଲିନୀ ପରା ।

ନାନାନନା ନାକୁଲେଶୀ ମନ୍ତ୍ରସିଦ୍ଧିଂ ପ୍ରଦେହି ମେ ॥ ୪॥

ଘୃଷ୍ଟିଚକ୍ରା ମହାରୌଦ୍ରୀ ଘନୋପମବିବର୍ଣକା ।

ଘୋରଘୋରତରା ଘୋରା ମନ୍ତ୍ରସିଦ୍ଧିପ୍ରଦା ଭବ ॥ ୫॥

ଶକ୍ରାଣୀ ସର୍ୱଦୈତ୍ୟଘ୍ନୀ ସହସ୍ରଲୋଚନୀ ଶୁଭା ।

ସର୍ୱାରିଷ୍ଟବିନିର୍ମୁକ୍ତା ସା ଦେବୀ ମନ୍ତ୍ରସିଦ୍ଧିଦା ॥ ୬॥

ଚାମୁଣ୍ଡାରୂପଦେବେଶୀ ଚଲଜ୍ଜିହ୍ୱା ଭୟାନକା ।

ଚତୁଷ୍ପୀଠେଶ୍ୱରୀ ଦେହି ମନ୍ତ୍ରସିଦ୍ଧିଂ ସଦା ମମ ॥ ୭॥

ଲକ୍ଷ୍ମୀଲାବଣ୍ୟବର୍ଣା ଚ ରକ୍ତା ରକ୍ତମହାପ୍ରିୟା ।

ଲମ୍ବକେଶା ରତ୍ନଭୂଷା ମନ୍ତ୍ରସିଦ୍ଧିଂ ସଦା ଦଦ ॥ ୮॥

ବାଲା ବୀରାର୍ଚିତା ବିଦ୍ୟା ବିଶାଲନୟନାନନା ।

ବିଭୂତିଦା ବିଷ୍ଣୁମାତା ମନ୍ତ୍ରସିଦ୍ଧିଂ ପ୍ରୟଚ୍ଛ ମେ ॥ ୯॥

   ଫଲଶ୍ରୁତିଃ ।

ମନ୍ତ୍ରସିଦ୍ଧିସ୍ତବଂ ପୁଣ୍ୟଂ ମହାମୋକ୍ଷଫଲପ୍ରଦମ୍ ।

ମହାମୋହହରଂ ସାକ୍ଷାତ୍ ସତ୍ୟଂ ମନ୍ତ୍ରସ୍ୟ ସିଦ୍ଧିଦମ୍ ॥ ୧୦॥

ଇତି ମହାକାଲସଂହିତାୟାଂ ଶ୍ରୀବାଲାମନ୍ତ୍ରସିଦ୍ଧିସ୍ତବଃ ସମ୍ପୂର୍ଣଃ ।